ဧရာဝတီမြစ်ရေကြီးမှု စိုးရိမ်ဖွယ် ရှိလာဦးမည်လား
Posted on Tuesday, July 10, 2012
|
No Comments
ဝါဆိုဝါခေါင် ရေဖောင်ဖောင် ဆိုသည့် အတိုင်း နှစ်စဉ် ဇွန်၊ ဇူလိုင်၊ သြဂုတ်လများ၌ ဧရာဝတီ မြစ်ကမ်းနဖူးတွင်ရှိသော မြို့များ၊ ရွာများအတွက် အမြဲသတိယှဉ်နေကြရပေမည် ဖြစ်သည်။ မြစ်ရေဝင်ဧရိယာရှိ အိမ်များကို ခြေတံရှည် တည်ဆောက်ထားသော်ငြား တကယ့်တကယ် မြစ်ရေကြီးသည့် နှစ်ဆိုလျှင် ရေလွတ်သည့် နေရာသို့ ရွှေ့ပြောင်းကြရစမြဲပင်၊ ဧရာဝတီမြစ်ရေကြီးချိန်တွင် အရေးထား သတိရှိကြရမည်မှာ အဓိကအချက် နှစ်ချက်ရှိသည်။ ပထမက ရေဝင်ဧရိယာအတွင်းရှိ မိသားစုများ ရေတက်မှု အခြေအနေကို သုံးသပ်၍ အန္တရာယ်ကင်းရာသို့ ရွှေ့ပြောင်းနေထိုင်ခွင့် ရရှိရေးနှင့် ဒုတိယအချက်က စိုးရိမ်ရေမှတ် ရောက်ရှိလာပါက မြစ်ကမ်းနံဘေးရှိ မြို့ကြီးများ ကျေးရွာများမှ ရေဘေးမှကာကွယ်ရန် ကြိုတင်ပြင်ဆင်မှုများ ဆောင်ရွက်ထားခြင်းများ လုပ်ဆောင်ကြရပေမည်။
မြစ်ရေတတ်ခြင်းသည် ပင်လယ်မှ ဒီရေမြင့်တက်သကဲ့သို့လည်း မဟုတ်ပေ။ ဆူနာမီလှိုင်းကဲ့သို့ ရုတ်တရက် ရောက်လာတတ်သော အရေးမဟုတ်၍ ကြိုတင်ပြင်ဆင်မှုများ ရှိထားပါက ဆုံးရှုံးပျက်စီးမှု နည်းပါးစေမည် ဖြစ်သည်။
"တိုင်းပြည်သည် ခေတ်သစ်စနစ်နှင့် တည်ဆောက်နေချိန်တွင် သဘာဝဘေးအန္တရာယ် ပေါ်ပေါက်တတ်သည့် ကာလတွင် သက်ဆိုင်ရာ ပုဂ္ဂိုလ်များက မိမိတိုင်းဒေသကြီး၊ မြို့နယ်၊ ကျေးရွာများတွင် ကွင်းဆင်း၍ ကြိုတင်ပြင်ဆင် ကာကွယ်မှုများကို တက်ကြွစွာ မပေါ့မလျော့ လက်တွေ့လုပ်ကိုင်ကြဖို့ ထပ်မံအသိပေးလိုပါသည်။
ပေါ့ဆလျှင် ကုဋေကုဋာချီ၍ ဆုံးရှုံးမည်။ တိုင်းပြည် နစ်နာမည်ဖြစ်ပါ၍ အသိချပ်ကြပါကုန်" ဟု ဆရာဦးခင်မောင်သန်း (ဒဿနပညာ) က ဆောင်းပါးတစ်ပုဒ်တွင် နှိုးဆော်ထားသကဲ့သို့ အတိဒုက္ခရောက်ချိန်မှ ကူညီခြင်းထက် မဖြစ်မီကြိုတင်ကာကွယ် ပြင်ဆင်နိုင်မှုသည် ကောင်းသောဆောင်ရွက်မှု တစ်ခုပင်ဖြစ်ပါသည်။
ဧရာဝတီမြစ်ရေသည် ဇွန်လ အလယ်ပိုင်းကတည်းက မိုးများပြီး ရေကြီးမှုသတင်းများ နေ့စဉ်လိုလို ကြားသိနေရသည်။ ဇွန်လကုန်သည်နှင့် အချို့သော အရပ်ဒေသများတွင် နေအိမ်များ ရေမြုပ်သွားခဲ့ရသည်ကိုလည်း ကြားသိရသည်။ ဧရာဝတီ၏ အစသည် မြန်မာပြည်အထက်ပိုင်းမှ စတင်လာသောကြောင့် တဖြည်းဖြည်းနှင့် ဧရာဝတီမြစ်ရေသည် မြစ်ရိုးတစ်လျှောက်သို့ ဖြန့်ကျက်ရန် ခြေလှမ်းပြင်၍ လာနေချေပြီ။
ဧရာဝတီဆိုသည့် ဝေါဟာရသည် သင်္သကရိုက် ဘာသာစကား အဓိပ္ပါယ်အရ ဆိုလျှင် (River of cool refreshing water) ဖြစ်သည်။ ဧရာဝတီမြစ်သည် မိုင်ပေါင်း ၁၃၂၅ မိုင်ရှည်လျားပြီး ကမ္ဘာပေါ်ရှိ သတို့သမီးဟု တင်စားခံခဲ့ရသော ဧရာဝတီမြစ်ကို “မြစ်ဆုံ” မှ မွေးဖွားပေးလိုက်ခြင်း ဖြစ်သည်။ မေခနှင့် မလိခတို့သည် မြစ်ကြီးနားမြို့၏ မြောက်ဖက် ၂၈ မိုင်ခန့် အကွာတွင် ပေါင်းစုံမိပြီး ဧရာဝတီ အမည်ခံလျက် မြောက်မှတောင်သို့ ဆက်လက် စီးဆင်းနေသော ဧရာဝတီဖြစ်သည်။ တန်ဖဲကျေးရွာရှိ ခရီးလမ်းညွှန်မိုင်တိုင်၏ အရပ်မျက်နှာအညွှန်းတွင် “မြစ်ကြီးနားသို့ ၂၇ မိုင် ၂ ဖာလုံ၊ ဆွမ်ပရာဘွမ်သို့ ၁၀၄ မိုင် ၆ ဖာလုံ၊ ပူတာအိုသို့ ၂၉၀ မိုင် ၆ ဖာလုံ မြစ်ဆုံသို့ ၁ မိုင်ဟု အတိအကျ ညွှန်ပြထားသည်။ မြစ်ဆုံမှာ ဒေသခံတိုင်းရင်းသားများက “မလိဇွပ်” (မြစ်ကြီး စတင်ဖြစ်သည့်နေရာ) ဟု ခေါ်ဆိုကြသည်။ မြစ်ဆုံမှ အစချီလာသော ဧရာဝတီသည် မြန်မာပြည်၏ အသက်သွေးကြောကဲ့သို့ ပြယုဂ်တစ်ခုပင် ဖြစ်သည်။
၁၉၇၄ ခုနှစ် ဝန်းကျင်ကာလက ဧရာဝတီမြစ် ရေကြီးမှုကြောင့် ဧရာဝတီမြစ်ရေသည် မန္တလေးဈေးချိုတော် နာရီစင်အထိ ရောက်ခဲ့သည်ဟု ကြားသိရသကဲ့သို့ ၂၀၀၄ ခုနှစ်ကလည်း ဧရာဝတီမြစ်ရေကြီးမှုမှာ ယခင်လောက် မဆိုးရွားခဲ့သော်လည်း မြစ်တာဘောင်ကို ကျော်လွန်၍ သဲအိတ်များဖြင့် ရေဘေး ကာကွယ်ရေးများ ဆောင်ရွက်ခဲ့သည်။ ထိုနှစ်က မြစ်ရေဝင်ရွာများတွင် ရေကြီးမှုကြောင့် ပြည်သူတို့၏ အိုးအိမ်များလည်း ပျက်စီးခဲ့ကာ ရေမြုပ်ခဲ့ရသည်များလည်း ရှိခဲ့သည်။
ထို့အတူ ၂၀၀၆ ခုနှစ်တွင်လည်း မြစ်ရေကြီးခဲ့သော်ငြား ၂၀၀၄ ခုနှစ်က စံချိန်ထိ မရောက်ခဲ့ချေ။ ယခုအချိန်ထိ မြန်မာပြည်အထက်ပိုင်း ဒေသများတွင် မိုးရေချိန်များလျက် ရှိသောကြောင့် ယခုလက်ရှိ ဧရာဝတီမြစ်ရေထက် မြင့်တက်လာပါက ဆောင်ရွက်ရမည့် ကိစ္စများကို ကြိုတင်ပြင်ဆင်ထားဖို့ လိုပေလိမ့်မည်။ မကြာမီလာတော့မည့် အရေးကို ကြိုတင်ပြင်ဆင်၍ ကာကွယ်မှု ဆောင်ရွက်ခြင်း၊ ရေဝင် ဧရိယာများမှ ရွှေ့ပြောင်းနေထိုင်ခြင်းဖြင့် ကြိုတင်ပြင်ဆင်သင့်ပါက ပြင်ဆင်ကြရပေတော့မည်။ ဧရာဝတီမြစ်ရေကြီးမှုသည် စိုးရိမ်ဖွယ် ရှိဦးမည်လား ... ဧရာဝတီ ... ချစ်သောဧရာဝတီ မရက်စက်ပါနှင့် ဧရာဝတီ . . .။
တင်စိန်
Post a Comment